JAHOWA PANGURUPI DI HAGOGOTAN

JAHOWA PANGURUPI DI HAGOGOTAN”

Nas: Jesaya 33 : 2 – 6

Diragam ni parungkilon na taadopi di portibi on, isara na torop ni napogos lam martamba, hademakon na so adong martontu, songoni nang keadaan ekonomi na so martontu, (minyak tano, dll maol jumpang laho tuhoron ni masyarakat), lampu listirikpe sipata mintop, songoni muse di situasi politik na holan mamingkiri hadirionna angka kalangan elit politik dohot lan angka naasing dope. Saluhutna sitaonon i boi do masa alani hadirionta jala boi do tong alani halak na asing.

Dibagasan turpukon mangadopi sitaonon do bangso Israel hinorhon ni pangalaho ni angka panggomgomi dihatihai ima di tingki harajaon ni raja Hizkia, na sai holan mangasahon gogona dohot pikiranna laho manguluhon bangso i tung so diparrohahon be angka poda, tona dohot hata ni Debata. Ditahi rohana do naeng pabidanghon nanirajaanna ima naeng laho manaluhon bangso Asyur marhite na manjalo pangurupion sian halak palistim dohot Misir. Alai diujungna ditaluhon bangso Asyur do nasida songoni nang Misir. Hinorhon ni hamongkuson ni raja Hiskia i, gabe mampanghorhonma tu ngolu ni bangso Israel (Juda) alani angka namasa i, marungkil jala marporsuk Ditongatonga ni kondisi na sisongoni ro ma Tuhanta marhite panurirang Jesaya, paboahon na parasiroha do Tuhan Debata tu bangsoNa jala sai marpangulahi do rohaNa. Adong tolu namansai ringkot dipaingothon panurirang Jesaya tu angka panggomgomi ima :

1. Taringot tu ngolu parugamoon : Ingkon tongtong satia bangso Israel tu Debata Jahowa jala hasatiaon i, patar marhite angka kegiatan peribadahan. 2. Taringot tu ngolu sekuler : Mencakup ngolu social dohot ekonomi, ingkon marojahan jala manghatindangkon hasintongan dohot hatigoran ni Debata. 3. Taringot tu ngolu Politik : Ingkon manghatindanghon jala manghajongjongkhon Debata Jahowa do raja ni sude angka raja marhite namanangihon hataNa.

Natolu sipaingothon, ndang dianturehon angka panggomgomi ima raja dohot angka siihuthon ibana, ujungna gabe lam tamba ma parungkilon dohot parsorion ni bangso i. Torop do di partingkian on pangalaho sisongoni, na sai holan mamingkiri dohot patujolohon na di rohana. Anggo lomo ni roha ni donganna dohot lomo ni roha ni Debata tung so dianturehon do. Molo ndung solot pangalaho sisongoni tu diri ni sasahalak gabe tubu ma pangalaho haginjangon ni roha na mambahen lomolomona sambing so parduli angka aturan dohot uhum songoni tu angka donganna lumobima tu Debata. Somalna saleleng so jumpang “sipaingot” sian Debata taringot tu pangalahona i, tongtong do datdatanna mangulahoni rap dohot sibolis i.

Molo ndung jumpang “sipaingot i” jala ndang tolapsa laho mangadopi dung jolo sian nasa gogona, ipe asa ro tu Debata mangido asi ni rohaNa. Pangalaho na songoni do jumpang hita di pardalanan ni ngolu ni bangso Israel mulai sian na haruar nasida sian tano Misir i. Mauliate situtu ma tapasahat tu Amanta Debata na burju i na sai tongtong manarihon ngolunta. Ndang hea dijujur saluhut angka hahuranganta i, Alai sai tongtong do marpamuati roha ni Debata. Ai ndada di halomohon Debata hamatean ni parjahat, alai hamubaon ni rohana do tahe asa mangolu (Hes. 18 : 23). Hamu angka dongan na hinaholongan ni Tuhanta i, Marhite hagogoon dohot asi ni roha na sian Tuhantai hamonangan do ujung ni harajaon ni Debata jala i do pos ni rohanta molo manahan hita marhabengeton. Alai dipardalanan ni ngolunta siganup ari dipartingkian on godang do taadopi angka hasusaan jala memang ari hasusaan do angka ariari nataboluson molo so manat hita mamparhaseang tingki napinasahat ni Tuhani (Epesus 5 : 16).

Alani i ma mansai porlu tangiang laho mangido pangaramotion sian Tuhani. Dibagasan tangiang ni angka na mangasahon asi ni roha jala marhaposan tu Debata dipataridahon do paboa na so margogo ibana jala holan mangasahon hatigoran na sian Tuhani do sihirimonna. Di angka halak na sisongoni sai tarpaimaima do i “di haroro ni Tuhan i” di tingki ari manogot manang bornginnai (ay.2). Tangkas taboto molo ari manogot, jotjot do i dipangke angka parjahat (musuh) laho pataluhon sadasada bangso manang huta natarpodom dope. Alai ndada dipasombu Debata angka napinarmahannai mago ditaluhon angka parjahat, ala sai rap do hita dohot Tuhanta i di ari manogot dohot bornginnai. Alanii tung holan Tuhantai do haluaonta di ari hagogotan i, tung saluhut do boi tarpatupa Ibana.

Dihagogoon ni Tuhantai digombarhon do di ayat tolu i, paboa tangan ni Jahowa sambing pe dilaluhon (menghardik) tu angka parjahat pintor mabiar do saluhutna. Lumobima molo ro Tuhani marhite parngongos ni soarana pintor marserak jala martimpalan do saluhutna angka musu i (Psalm 2:5). Tung torop pe angka bangso laho mangagohon bangso ni Debata jala manggomahi angka tabantabanna, tung so loason ni Debata do i. Ai nunga gok uhum dohot hatigoran ni Sion dibahen. Ganup halak na marhaposan jala manghaporseai Jahowa di ngoluna ndang tagamon ibana maporus. Marasing situtu do Ibana sian angka debata ganaganaan (dewa-dewa) angka na disomba bangso sipelebegu. Ia Debata ni Israel ima Debata na sangap jala nabadia nahundul diatas ni angka langit dohot bangso saluhut jala huasoNa diginjang ni saluhut angka huaso nadi tanoon. Ima hajongjongan ni Debata alai rade do Ibana mian di Sion nagabe sada huta na gok hasintongan, hatigoran dohot hadameon.

Digoari do tongtong Sion nagabe huta na gok haluaon marhite hatuaon, hapistaran, parbinotoan dohot biar mida Jahowa ima arta partondion sian Jahowa. Huria na hinaholongan ni Tuhanta, Sai tong do mangaranap matangku tu Jahowa, ima goar ni minggunta di tingki on. Alanii jamita on manogihon hita asa tangkas ngolunta manatap tu Jahowa, unang holan na ditanoon tapingkiri jala tahirim. Molo tung pe rongom ro angka sitaononi marsingkatsorin di parngoluonta naeng ma hita manat laho mangadopisa. Unang gamang (gegabah) laho mangadopisa gabe mambuat sada haputusan na salah holan ala mamingkiri na ringkot di haporluan ni ngolu parsatongkinan, alai ingkon tangkas ma hita mangaranap tu Jahowa nanaeng pasahathon haluaonta di huta nauli huta ni Debatanta i, na so adong be siaeon angka na hansit disi. Molo tung porsuk tataon nuaeng on, tung so pasombuon ni Jahowa do hita laho mangadopi i. Alani i pasahatma dalanmu tu Jahowa jala haposi Ibana, asa Ibana paturehon, Amen.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s